म को हुँ !
म को हुँ !
जे भनेर तिमीले चिनेका छौ
के म त्यही म हुँ त !
अनि
मैले चिनेको म म हुँ त !
म को हुँ !
मैले चिनेको म म हैन भने
तिमीले चिनेको म कसरी म !
म कस्तो म !
म को हुँ !
तिमी को हौ !
आफुलाई चिनेका छौ ?
यदि छौ भने
म तिमीले चिनेको म हुँ !
यदि हैन भने
तिमीले नचिनेको म हुँ !
म तिमीले चिनेको म झन हुँदै हैन !
म त तिमीलाई चिन्दिन
किनकि
आफुले आफैलाई नचिनेको !
म आफुले आफुलाई
खोज्दै गरेको
म को हुँ भनेर !
साँच्चै म को हुँ !
साँच्चै म के हुँ !
म काहँ आएको !
म जहाँ छु किन यहाँ छु !
म कसको हुँ !
को को र के के मेरो हो !
केका लागि यहाँ छु !
किन र कहिले सम्म यहाँ छु !
म शरीर हुँ कि प्राण !
मैले चिनेको म
शरीर र प्राण हो भने
यसको आयु छ नी !
म को हुँ भनेर खोज्ने
म को हुँ !
म कतै कसैको शरीरमा
प्रवेश गरेको चेतना त हैन !
जो अमर छ, निराकार छ !
चेतना हुँ भने म कस्तो चेतना हुँ !
भौतिकवादी कि अन्धविश्वासी ?
(२०७९ फागुन १९ नयाँ वानेश्वर)
No comments:
Post a Comment